兒童樂園

關門大吉

2010-10-29T15:32:00.001+08:00

現宣佈：這個成人「兒童樂園」關門大吉。

天理何在

2010-09-12T12:01:00.002+08:00

Manager A:老細，嗰份要比Ｄboard of directors睇既業績報告表有十幾度錯喎。

老細：吓咁嚴重，錯乜呀？

Manager A:都係Ｄtypos同埋formatting囉

老細：咁你搞搞佢啦，順便話吓負責做叫嗰位同事

Manager A:好啦，我出去做嘢

老細：未住，你話比嗰位同事知ｏ既時候，話你係lunchtime撞到我，同我講咗，唔係唔同佢講，費事影响大家工作關係。

Manager A:....

哀悼

2010-08-31T15:13:00.000+08:00

秘書：大老細嗰邊話話星期四九點鐘為不幸事件的死難者進行簡單追思儀式。全公司Ｄ人都要到。

老細：呢輪要做月結，忙到死，默哀三分鐘咪得囉，搞咁多嘢做乜吖，方死我哋未夠煩咩…..

星期五早上……

老細：蝦，你睇吓我哋條team幾勁，尋日個個準時返嚟追思，大老細今日係senior staff meeting讚我哋吖。

秘書：…….

越改越喎

2010-08-02T13:11:00.001+08:00

經歷了無數改朝換代，我終於明白為甚麼大至社會，小至一個工作單位總是越要進步，越退步。這大概因為每位新老細上任，都覺得自己比以前那個好，為了證明自己的優越，必然要改革舊制度，本來新人事，新作風，是對的，但當有了這個「舊如新」的情意結，便會逢舊必反，連有效的舊制也一拼剷掉。那新制度呢？哈哈，思想偏狹的人還會想出甚麼進步的制度？

廣告公司是如何運作的

2010-07-15T15:35:00.001+08:00

「電訊公司甲」請「廣告公司乙」推廣其最新IDD long distance calling plan。最後乙決定以「情繫一線」作為宣傳主題。一個月後，乙公司的Creative Team 交咗三个平面設計圖出來：

1) 一對民初戀人，一個在上海，一個在歐洲，大家不約而同站在兩地的郵電局門前
2) 九十後俊男美女在海上滑浪
3) 一位嚴肅校長在操場訓話，但學生們又跳又笑

Account Manager 見到設計後….

Account Manager: 个宣傳的主題係「情繫一線」哦可？

Creative Director: 係呀！

Account Manager: …….

我做過舞小姐……

2010-07-13T10:51:00.002+08:00

香港社會運動的新進學生領袖周澄小姐在「壹週刋」自爆自己曾做過舞小姐，「賣藝不賣身」，又謂這都是「社會經驗」，沒有甚麼大不了云云……真笑死我了。

周小姐，如果你是一心了解社會去做舞小姐，這是你的選擇，(當然如果你沒有考慮過給大佬霸王硬上弓的情況，又或如何識別迷姦水飲品和向毒品說, 相信你的大腦那時正在休假) ，正是「人各有志」，旁人不得多事。但我覺得你可笑並不是你做了甚麼而是你為了前男友說你賤，你就賤給他看，你的獨立思考去了那裏？人哋話你賤，你就要這樣「回敬」了嗎？啊，看到這裏，某些幹勁十足的八、九十後，一定會反駁說：她是獨立個體，成年人嘛，只要她覺得ok，有何不可？她只不過用方法去療傷，與一些人在失戀後，狂做運動，買衫，甚至努力賺$還不是同一道理？佢都不知幾有獨立思考，你道德潔癖, 無邏輯思考就真，仆街啦……

哈哈，年輕人，如果周小姐真的覺得自己只是「另類療傷，順道爭取社會經驗」，就用先下手為强，自爆自己只是「金魚」了。

對於自己的言行，欠缺自省，批判，只懂狡辯和合理化，由他們這些獨立特行的前進份子領導社會運動，香港真的有明天嗎？

喧鬧

2010-07-13T10:50:00.001+08:00

日日透過傳媒喪鬧，狂插，讓真正的對手暗笑你們在「籠裏雞作反」，是大家想見到的「政治現實」嗎？年青朋友們，你們因為別人出賣了你的信任而憤怒，甚至要以衝擊和圍堵的方法來表態和顯示力量，我是明白的，但是喧鬧過後仍是要好好想一下長遠的「運動目標和策略」，還有，口是心非的「從政人士」，存在於任何政治組織，切記，切記。

維園阿哥現象

2010-06-24T17:19:00.000+08:00

如果有留意新聞的話，你會發覺香港有很多「任亮憲」，自從維園阿哥任亮憲成為傳媒焦點，在鏡頭前，不少關心政制改革的年青人說話時，都是一個模樣---大大聲，手指指，挺胸，瞪眼叫罵，當然任亮憲並不是這派的開山祖師，黃毓民才是吧！震耳欲聾的聲調、重覆的詞彙、樣版的姿態、究竟他們的發言，又有多少事實與數據支持？

有話好說

2010-06-22T12:41:00.001+08:00

「真理越辯越明」，但要做到這樣，起碼要讓不同意見的人，把話說完，那怕那些是廢話，謊話。喪鬧只達到表達憤怒的目的。

維園阿伯是人身攻擊，破壞討論，維園阿哥的行為也不可取。不過叫罵，起哄我可以接受。能動粗是我的底線。

退化

2010-06-10T15:38:00.000+08:00

以下是一段真實對話：

祕書：喂明嬸(office cleaner) ，唔該你幫老細抹咗佢檯面嗰 “撻” 墨水漬。

明嬸：墨水漬比較難搞，我試下啦

祕書：Ｄ大人物寧舍煩，用乜鬼墨水筆吖，你試吓啦，唔得就罷。

過咗兩日….

明嬸：我問Ｄ同行借咗枝專起墨漬的藥水嚟幫老細抹枱啊

祕書：噫，咁好，枝野係邊度有得賣吖？

明嬸：無得賣，我个fan聽曾Sir節目，自己學溝出來的清潔劑嚟。

祕書：咁呀，唔駛搞啦，費事第日你走咗，無人識搞，老細詐形

明嬸：……

「香港精神」？

2010-05-07T15:19:00.000+08:00

成日聽見人講「香港精神」，究竟係Ｄ乜野嚟？如果你問香港泛民主派參政人士，佢哋會話係民主、自由、法治….. 。香港回歸前有自由、法治，但係無民主，當然依家都無民主。撇開有無的問題，即使港人愛自由、法治，但也不見得是甚麼核心價值，因為講得出核心價值起碼是大部份人擁戴的看法。你或者會challenge我話很多民調都話超過60%的港人支持普選，也希望維持法治，但各位朋友，口說支持好容易，唔好話要學革命先烈咁拋頭臚，洒熱血，叫人出來投票都難，那我們有幾熱愛民主、自由、法治？

另一個講法，相信係大部份港人都接受的是「勤勞」、「拼搏」、「多勞多得」、「實際」、「肯變通以賺取所要的」、「樣樣要快人一步」。對不起，這也不是甚麼香港「獨特」的集體信念，上述的形容詞適用於很多經濟起飛的中國城市。七十年代初的香港，工商業起飛，香港人無論學歷高低，只要肯搏、上位機會很多，因此，社會的氣氛積極，社會也富裕起來。但香港人漸漸忘記了humble的出身，因為有＄，學歷提升，大香港主義成形，自吹自擂，真的以為自己了不起。一場九八金融風暴，股市，樓市大跌，失業率高企，令港人自我形像跌入谷底，因為我們發財而不立品，有學歷無學養。前財政司梁錦松大談甚麼港人振作，「獅子山下的精神」，但君不知，所謂「優質香港精神」只是特定的時空產物，香港人最核心的價值是「揾快＄」、「急功近利」、「推崇賺錢上的成功」，所以兜兜轉轉十二年，還未成功轉型。當然$多的時候，我們願意多照顧弱勢的人(包括在八十年代照顧大陸的親友) ，中產階級因衣食足，而要多些民主，但始終沒有培養出優秀公民素質和城市的品格。港人黃福榮在青海捐軀，令人敬佩，但那是「黃福榮精神」，而不是甚麼「香港精神」。

古來征戰幾人回......

2010-04-27T12:32:00.002+08:00

<塞下曲> 盧綸: 林暗草惊風，將軍夜引弓，平明尋白羽，沒在石棱中。

將軍の鎮魂歌

2010-04-25T00:43:00.001+08:00

猛虎終須山上喪，將軍難免陣中亡。

以唐寅<桃花庵歌>明志

2010-03-05T16:44:00.002+08:00

桃花塢裡桃花庵，桃花庵下桃花仙，桃花仙人種桃樹，又摘桃花換酒錢。洒醒只在花前坐，酒醉還來花下眠。半醉半醒日復日，花開花落年復年。但願老死花酒間，不願躹躬車馬前。車塵馬足顯者事，酒盞花枝隱士緣，若將顯者比隱士，一在平地一在天，若將花酒比車馬，彼何碌碌我何閒。別人笑我太瘋癲，我笑他人看不穿，不見五陵豪傑墓，無花無酒鋤作田。

註：唐寅說顯者在地，隱士在天，此言差矣。隱士樸實，種桃樹，不就脚踏實地在做事嗎？反觀顯者多追名逐利，浮誇至極，如天上浮雲，變幻不定。

邢國史綱續編

2010-02-16T14:55:00.003+08:00

同德二年，南候蒙正自裁謝國。刑王雖則大喜，仍憂故南候封土之治，遂召南地大夫，士人相討國政。仁傑原為陳國大臣，年少英偉，甚得刑王賞識，禮聘入刑，封南地中大夫。

隆冬某日，朝堂議事，三候及其随行上大夫及南地上大夫覲見刑王。各大臣嚇見仁傑，心中有疑，概因見王面者非諸候及其随行上大夫莫屬。北候郭昆(郭仲後易名郭昆)，問王曰：「仁傑乃南地中大夫，何以入朝？」

王曰：「仁傑年少持重，熟番外民情，刻下，大刑將開疆辟土，吾召其議事。」

北候回稟：「國有國法，家有家規，破之则國不立也！」

王心不悅。

西侯魯肅見此拍案而起：「王乃聖賢，其意旨上感天意，下通民情，今召英材助政，乃刑國之福，一方諸候，何以口出狂言？」

北候怒曰：「吾一心為國，無逆王之心，東候之言陷吾於不義，其心可誅！」

東侯尤召遂曰：「吾王英明，在此用人之際，能破格宣中大夫入朝，乃王者之風，吾等謹遵聖王之道，薦本地之英材入朝，何如？」

東土上大夫正色道：「若不拘一格，則下大夫亦可舉薦入朝以昭聖德。」

王知仁傑入朝不得臣心，唯其心計甚深，藏其不悅曰：「諸位乃吾股肱之臣，仁傑得位受疑，入朝一事暫緩，日後再議。」

常謂當局者迷，刑王自始喜隨一己之意，賜賞降罰，朝風如此，豈今日之事？

虎年小故事

2010-02-16T10:19:00.003+08:00

今年是年初三，「新正頭」，想同看官分享勵志小故事一則。話說新年前，向舊老闆問好兼拜早年。去年他身体不好，大病一場。我們閒話家常，我也update一下他香港最heat的話題，講到八十後，和香港的未來，一個六十幾幾，又有大病的人，仍是非常關心下一代的將來，我真係感受到他心中那團火，即使到了人生的黃昏階段，在茲念茲，仍是人的長遠發展。下次抱怨「天天營營役役都唔知為乜？」時，我會想起舊老細的那團火。

八/九十後

2010-02-03T16:39:00.000+08:00

呢期好鬼興講乜野「八(九)十後好激進」，其實代溝，唔同年齢階層的對立，早已有之。有次同個大行做野的前輩講起，他說個個年代，間間公司都有Ｄ老屎忽，能力麻麻，因緣際會上左位，平日又唔做嘢，最鐘意指指點點，忌才，唔比後生上位。

現在是二戰後六十年，個世界在這六十年內無大戰爭，人類繁殖得咁上下，資源唔夠，傳統發展機會有限是正常的。如果真係有「天道」、有「循環」，世界將會大亂一次，咁未重新推牌玩過囉。

話題差遠咗……，點解Ｄ八/九十後咁鬼不滿，的確學Ｄ高官、或乜學者話，呢班人出生、成長於香港繁榮時代，好物質享受，唔吃得苦，要求多多，所以先會咁唔滿足，但Ｄ高官(好多都係八/九十後的父母)無講到點解現在嘅年青人係咁嘅德性。之唔係比佢哋的口不對心、言行不一的父母教出來。我不相信現今特区高官或忽然愛國的人士的仔女會真正愛國，因為他們見到父母只為更高的權位和金錢而親近阿爺。

Ｄ八/九十後咁，除了因為覺得自己無前景，無將來外，最討厭就是被那代問題製造者，天天扮哂憂國愛民來「打救年青人」，或者批評他們non-productive。

仲有，大部份反高鐵的年輕人，我指係十幾至三十幾個班，都不知幾平靜。只有少數人推鐵馬，唔吇講到所有反高鐵的人好暴力。

三個願望

2010-01-05T16:53:00.000+08:00

從前有位小妹妹，日日發夢自己會變成公主。有一日，佢遇到個神仙，神仙答應比佢三個願望。

小妹妹：我要住哂皇宮每一个角落

神仙望吓佢，覺得佢只係一個人，唔需要覇咁多地方喎，但係神仙好仁慈、只係微笑，話：「你的願望達成」。跟住神仙又問佢有乜願望。

小妹妹：我要參加所有的宮庭宴會，大出風頭。神仙眉頭一皺，心想你不累的嗎？不過既然有言在先，都要遵守諾言，便說：「你的願望達成」。

神仙：最後一個願望了，你要小心說啊！

小妹妹：我要做國皇的女兒，佢剩係錫哂我。

神仙心想你個死蠢，你早講呢个願望咪可以慳番頭兩個願望囉。

結果小妹妹搖身一變，成為國王最寵愛的公主，天天參加大小规模的宴會，大出風頭，皇宮內的地方，全為她所用，但是她沒有美貌、沒有智慧、沒有……..。

此文章乃轉載-- [為五十後伸寃」

2010-01-05T16:14:00.002+08:00

寃枉呀！

最衰嗰個乜鬼教授，得閒無嘢做，寫本「香港四代人」，搞到我哋呢Ｄ五十出頭的人，成為人民公敵，鬥爭對象。

係，我哋呢Ｄ五十出頭嘅人，係好似好掂，如果你當年係港大生、或者留學生吖嘛，好似我哋呢Ｄ，當年入唔到大學，出嚟打份工，最初做merchant、後來做過電器Sales，又入咗電訊業，結咗婚，有個同衝擊中聯辦Ｄ靚仔靚味咁上下大嘅仔，有個七百呎單位，係好似上咗岸，但係都係一步步捱過嚟嘅。

我承認97前，幾次Ｄ股大上大落時，我好彩，唔止避得過，仲執到多少，因為咁，賺夠首期，買咗人生第一層樓，但係97時，為咗改善居住環境，我換咗大單位，結果樓市一冧，我變咗負資產，樓市係好番，但个氹起碼要填多幾年。仲有，前年比公司裁咗，好彩有個兄弟照住，依家揸夜更的士，兼靠老婆份工才捱得住。個仔只係讀緊大學二年級，又話要讀碩士，仲有排捱，世界艱難，我都唔敢望佢養我，求祈佢搞掂自己就好啦。

所以話香港「第二代人最着數」，講嘢咩！應該話最着數嗰Ｄ係當年所謂的「港產精英」。唔該Ｄ八十後，認清鬥爭對象，我哋呢Ｄ中年阿叔，阿嬸，為兩餐同Ｄ仔女，已經好頭痕，無壓迫你哋吖！怨有頭、債有主，唔好搞我哋。

仲有，唔該Ｄ「五十後掌權者」反醒吓啦，唔好以為人哋憎你係出於妒忌你嘅成就，係因為你哋為富不仁(「富貴於我如浮雲……」，我呸！)，謀取暴利，位高權重，資源倾斜大商家，製造社會矛盾。香港比你哋搞死！

辦公室之大迷信

2009-11-14T13:31:00.001+08:00

以下是一則真實對話：

祕書A (手執專著粉紅戰衣但羅庚都睇錯個位命理紅人)：唉丫死啦，出年虎年我犯太歲兼有是非、小人星入命，嚟Ｄ高層鬪爭，我要小心Ｄ….

文員B：犯太罪下，咁你咪屬….，哈哈，你駛乜咁驚，你咁低級唔會影响你

文員C：咁又唔係咁講，自從李sir「棄胡」，大魔王日日諗計重組，你知啦一講親重組，梗揾人祭旗。

Supervisor D ：好心你哋有時間就做好Ｄ嘢，唔好信埋Ｄ風水野，講少Ｄ是非啦….

後生E: D姐，你話搬位，我得啦，依家幫你丫！

Supervisor D:喂12點咋，等多陣啦…..
*****************
Supervisor D 走後……
*****************
祕書Ａ：Ｅ仔乜阿Ｄ姐叫你等一陣呀，佢平日乜都話要即刻，做遲一陣都比佢丙到豬頭咁…..

文員F (幫老細冲奶茶行過)：佢話「未時」係吉時喎！

社團之「一念天堂、一念地獄」

2009-10-03T10:56:00.000+08:00

今日，岳少又係企番係五十二樓甲級寫字樓，望住維港的夜色，但今晚的心情完全唔同哂。因為佢嘅的眼中釘----喪狂終於比佢「搞掂」咗。大家唔好以為岳少終於請咗個湖南仔買起咗喪狂。岳少咁大仁大義，請咗個叔父佛祖「勸」佢收山，喪狂都唔係儍嘅，索到陣味，自己賴身体唔好，話要金盆洗手。岳少順勢幫佢「執骨」。

有一日喪狂召哂Ｄ靚同佢哋sai yo na la，仲話當初都係本住為社團，所以好堅持自己做嘢要「諗頭行先」的做法，估唔到，一向講大勢，講食腦，嘅岳少，原來係紙老虎，一見Ｄ叔父詐型，當堂回哂堂。喪狂係咁同佢Ｄ靚唱佢嗰隻「霸王哀歌」，Ｄ靚心諗，今日搞成咁，都係因為你樣樣爭做最後話事人，先引起岳少猜忌。

齋噏咗一輪，喪狂話要搞埋Ｄ手尾，叫哂佢Ｄ靚出去，然後……佢揸住个電話話：「……岳少以為咁就整死我，我喪狂係喪，呢條數成會記住先，有一朝，我要連本帶利收番。哈哈。」放低个電話……

一念天堂，一念地獄，究竟喪狂跟住會有Ｄ乜嘢動作？

社團之家法

2009-09-07T10:48:00.000+08:00

嘩！喪狂比人狂劈！！！靚森好落力咁保護大家，一脚撑開个刀手，同佢搏命。結果刀手不敵東昇的金牌打手，當場比佢打瓜。至於喪狂都算命大，咁比人斬法都死唔去，淨係入廠大修，怪唔之得，佢一向話自己係貓精托世，有九條命……

今晚月黑風高，岳少係自己52樓的甲級寫字樓的落地大玻璃超豪辦公室，揸住杯紅酒，望住維港的夜色，好無癮咁自言自語…. ：「早知係咁，我就比貴Ｄ，請个湖南仔，一刀收佢皮……唉，嗰靚森又係，又話呢個一定掂，有乜理由斬佢三十幾刀都唔死…. 唉….. 」

岳少，便宜莫貪呀！

社團之收靚風雲

2009-08-16T14:55:00.000+08:00

時代唔同咗，連黑社會都搞乜野企業化，制度化。幾十年前，Ｄ細路哥比人踢入會，要燒黃紙，上香，兼發誓(念詩) ，依家就簡單得多嘞。之不過少咗儀式，同埋叔父講番社團Ｄ”威水史” ，Ｄ靚無乜歸屬感，成日玩過底。身為「日升」的龍頭，阿岳少呢日約埋Ｄ壇主、香主開會傾下新的收靚儀式……

岳少：大家都知道今日傾乜架啦，Ｄ靚依家越嚟越唔識規矩。喂喪狂，舊年叫你搞Ｄ新意思，不過無乜作用咁喎？

喪狂：超！我哋照足阿公吩附，做番飲雞血，上香嗰幾味架啦。Ｄ靚覺得好新鮮呀！

岳少：叫得你做，我要見到效果，要响躲，要有內屎(noise) 呀。靜到烏蠅飛過到聽到，我哋比「青聯」班仆街笑吖！

喪狂：唔係麻，唔聽阿公話，又話我自把自為，聽笛又話無乜屎話，你講哂啦！

專營丸仔既Ｋ后搭ｏ爹：喂兩位大哥，你哋係咁抝，無x用。想今次边個揸旗，開边弄，都要有個講法。咁樣落去，我哋咁多個” 堆” 既人，無得搞嗰喎？

呢個時候，岳少”稍” 咗靚森一眼，有個生面口嘅四九仔手起刀落，一野劈落喪狂度，嘩……

原來是鴻門夜宴，究竟喪狂會唔會一刀收皮，欲知後事如何，下回分解。

去年今日

2009-07-28T17:59:00.001+08:00

以下係一節報館開會實況

老總：大家不如講下點樣可以賣多Ｄ「紙」？

編輯：老細，呢個年代也都電子化，睇嚟都要報紙同新聞網一齊搞。

IT佬：我哋無話唔得既，最重要係公司肯放幾多資源去upgrade個system

採訪主任：要銷量，最緊要有名人撐。

老總：咁我哋要聯絡多Ｄ名人…..

編輯：我哋已經交了一個suggested list同名人專欄既proposal (這事係年半之前發生)

全場鴉雀無聲….

老總：ar ar ar，係喎舊年我哋已經話咗咁做…哈哈哈得我跟進吓。
*****************************************************************
「凡造五逆罪（殺母、殺父、殺阿羅漢、破和合僧、出佛身血）及十重罪（殺生、偷盜、淫邪、妄言、惡口、綺旖、兩舌、貪欲、嗔恚、邪見等），死後必墜於無間(阿鼻)地獄。」

各位打工仔，有無覺得返工似去咗無間地獄，去年的問題即今年的問題，今日的問題又變成明日的問題，不禁要問，我哋做錯Ｄ乜嘢？

大邢史綱下

2009-07-11T18:08:00.000+08:00

邢王鴻鵠之志，誓效文王，太宗開大治之局，見四候未能同心輔政，繼東望芙蓉小國。東海芙蓉女主鳳來，見識過人，國內文風大盛，即小兒亦能詩賦。邢王欲招納芙蓉，令兩地官民互通往還，收移風易俗，教化邢民之效。

惜邢王妙策，未竟全功。自芙蓉入貢，鳳來與邢王，朝夕相對，女主傾情大王，無心政事，常借故接近，令王不勝其煩。後鳳來見王，親邢臣，遠芙吏，不禁悲切傷懷，最終成疾，乃至有四十日未及早朝之事。有謂神女有心，襄王無夢，只怪當日痴心錯付。大王亦恨其痴纏，欲擺脫之。

同德 [註一] 二年仲夏，邢王對月獨酎，念己修德勤檢，欲為民請命，奈何輔政之人，多力有不遞或心懷異志之徒，又怨四海未平，內憂外患，急怒攻心，激憤吐血，垂首於功成殿。

[註一] 邢王招納芙蓉之時，表一視同仁，改元同德，乃同享聖德之意。

大邢屎缸上

2009-07-09T00:07:00.001+08:00

邢國聖德元年，邢王為長治久安，分封四候，東候尤召，西候魯肅，南候蒙正，北候郭仲，共輔朝政。

邢王倚重蒙候，欲開辟疆土，大振國威。惜大王所託非人，蒙正不務正業，但南邑之地，卻遙役不斷，黎民百姓，叫苦連天。三候亦怨邢王獨寵蒙正，恨蒙氣燄。所謂路遙知馬力，蒙候癲倒之事，邢王時有聽聞，且其人桀驁不馴，屢違王命，遂削其權，辱之而後快。王憂國傷懷，獨侍衛常就能令大王釋懷，王與常，親密無間。究竟常有何過人之處，唯王知之。大王恩寵有加，乃破格提拔，為工部之首。一介武夫，目不識丁，朝政大事，如何克當？常就恃大王之愛，為私忘公，惹朝臣非議。邢王用人不當，有傷國本，有識之士莫不搖頭嘆息。

小测試

2009-07-02T17:02:00.000+08:00

下屬Ａ：ai ya，老細你開完會嗱，辛唔辛苦呀？

上司Ｂ：生意難做，Ｄ投資者自己環境都唔好，叫佢地攞＄投資，好難嘞。

下屬Ａ：放心啦，我哋條team，好有士氣，大家最多開多Ｄ早禱會，度多兩條好橋sell客，一定掂，我幫你倒杯茶先啦。

翌日，下屬Ａ收到份memo......

下屬Ａ（大大聲）：有無搞錯吖，我哋做Sales，梗係有客先返工啦，做乜要我哋準時返工開會吖？

各位老闆，請計算你的down-line裏，有幾多個係下屬Ａ這類人。

- 10%以下：恭喜你，你無乜Ｄ得把口，又唔想付出的下線
- 10%至20%：你要好好整頓呢Ｄ口是心非的人
- 21%至49%：請反省你的管理手法
- 50%或以上：都恭喜你，你可以唔駛做，因為你檔生意「冧」硬，早Ｄ供定份退休保險為上策

六月巨献----社團

2009-06-27T22:48:00.000+08:00

話說社團揸fit人岳少，唔妥佢條靚喪狂，月月無數交，平日對佢又無大無細，仲四圍「辣慶」Ｄ叔父。為咗令社團可以正常運作，岳少召喪狂照肺……

岳少：喂喪狂，出嚟行，要講口齒，幾個月前，你應承每月將係外圍檔收到Ｄ數交比阿公喎，點解我無收到＄？

喪狂：岳少，依家經濟低迷，Ｄ人边有咁多＄賭外圍，加上我Ｄ靚，唔多幫到手，無計喎。

岳少（有Ｄ勞氣聲）：米耍我啦，你做人大佬，管Ｄ靓係你責任，佢哋唔聽駛，你就要想辦法！

喪狂（開始喪）：我唔識管？！哈，我以前係「正興」話哂都係揸大鎖匙嗰個，唔係諗住大家拍住揾真銀，我會嚟「日升」？岳少講嘢唔駛去到咁盡吓嘩。

岳少（威脅咁話）：我唔想講番以前，總之你再交唔到數，莫講話我唔ＯＫ，Ｄ叔父都會要我做嘢，到時唔好話我唔顧兄弟情，你睇路啦！

喪狂（好鬼大聲）：我喪狂乜嘢大風浪未見過，我係社團界起躲嗰陣，你岳少戒奶未吖？一句到尾，我做嘢有自己嘅方法，唔似你，一日到黑淨係睇住嗰幾個老鬼面色做人，狗到唔恨，嘅然傾唔「埋蘭」，就各自各做嘢、睇吓点？

喪狂轉身就行，岳少嬲到塊面到紅哂，一手攞起嗰電話…..

岳少：「靚森」，有人敬酒唔飲，飲罰酒，你知點做啦

嗰邊傳嚟一把嗲聲：大佬駛乜咁勞氣，我「靚森」順番你吓。

究竟岳少會點對付喪狂？岳少同靚森兩個大男人搞边科？喪狂會唔會絕地反擊？請繼續支持ＫｉｕＰａｉ！

對話 2

2009-06-26T10:26:00.002+08:00

上司丙：你份報告Ｄ英文有問題，嗰句應該改為 "The cash received from clients has been kept in the company's safe which is locked in Rm. xxx"

下屬丁 (大學畢業生，面有難色): ae...ae....個 which 後面應該用單數定雙數？

上司丙：company's safe 吖嘛！

下屬丁：company, "si"，有s喎

上司丙：....

對話

2009-06-26T02:04:00.001+08:00

上司甲：為咗令每個salesＤ數清淅Ｄ，最好叫佢哋以後自己keep住自己條數同Ｄ客嘅付款，方便查核，大家有乜意見？點實行呀？

下屬乙：為咗方便查核，我哋每位sales會keep自己條數同Ｄ客嘅付款。

上司甲：…….

兒童樂園回歸

2009-06-24T00:41:00.000+08:00

唔好以為我哋Ｄ辦公室游擊隊散哂band，其實過去兩個幾月，好戲連場。

上演的巨献包括：

(一) 辦公室處境喜劇:「喪屍暴動」---話說有幾條喪屍四出搞事，一陣又情緒失控，一陣又玩失憶，乜projects都話唔关自己事，真係「無線新聞，事事甩身」。自己唔做嘢唔緊要，但係將Ｄ重要資訊收埋係地氈底就當無嘢。此乃偷懶之化境是也。

(二) 古裝大劇：「怒打昏君」---以「只可州官放火，許平民點燈」為座佑銘的昏君，自己唔掂就唔計，一味賴朝臣辦事不力，結果鎮國公一手献萬言書，一手執打王鞭，昏君見勢色唔對，只好「下詔罪己」以平民憤，真係大快人心。

(三) 歷史紀錄片：「烈士忠魂」---為咗革命理想，無名烈士竟自願攬住个計時炸彈離開革命據點，自我犧牲，點知陰差陽錯，個炸彈落係敵軍臥底手上，炸佢個稀巴爛，場面偉大。

(四) 愛情小品：「錯愛」---女主角天真嬌断被騙，幾經滄桑，在一個無星晚上，倚窗嘆道：「我愛你，但你愛我嗎？」。唉，可恨天下男兒多薄行，「lam」盡之後，真係「關人ｘ事」！天真嬌最後能否覓得真愛？劇情賺人熱淚，萬勿錯過。

辦公室政治之「四兩撥千斤」

2009-04-16T16:28:00.000+08:00

很多人厭倦辦公室政治，複雜多變的人事鬥爭令人感到很無奈，很疲勞。想解脱？得！只要你學識「四兩撥千斤」：

(一) 等價交換的道理---要年青人訂立工作目標不困難，以大學畢業的年紀起計，甚麼5年要做到中級主管，10年做部門主管，又或者30歲前賺到人生第一桶金。但如何實踐呢？睇那些什麽致富有道的雞精書？問前輩？走後門？歸根結底是要知道要有甚麼樣的成果，就要有什麽樣的付出，想快上位嗎？那你願不願意與老細上床？擦鞋、篤背脊？噢，有違道德或個性？那就想吓其他自已願意接受的方法-----勤力過人、不斷增強專業知識、改善待人接物的態度……。同時也不要妒忌那些「旁門左道」上位的人，因為他也付出代價。保持心境平靜是令你在職場得自在的最重要元素。

(二) 做好本份---注意是「做好本份」，不是「做咗本份」，fine quality of work 是你最重要的生存資本。至於「做好本份」係人都識講，但如何拿揑分寸卻大有學問。只做 “份內事”會給人計較的印像，但什麼也一把抓，最後會累壞和心生怨恨。所以最好合約在手要好好研究工作範圍，要觀察老細對其他同事的要求和工作量，最初不要常托手掙，但過一、兩個月，如果老細老奉要你加班，其他同事只懶懶閒，那就要醒目些，找一些堂而煌之的藉口去推，例如報些short courses，令自已一放工即走，星期六、日也要上課，訛稱「要照料有病的xxxx」，甚至話自己病…..。還有不要多管閒事，即使知道有什麼不公平的事，只需心裏有數而不要妄開尊口，議論一番(除非你不怕你的說話傳到當事人那裏)，遇到以下兩類人必須敬而遠之：是非精與揾着數的同事。

(三) 如夢如如幻月，若即若離花---同事的緣份隨時可断，所以不要太認真，也要甘心接受今天與你稱兄道弟的同黨，他朝係你最強橫的敵人，所以同事友好禮貌的相處固之然重要，但也要保持適當距離。不要將家事隨便透露，免得你的老細睇死你需要份工，就食硬你。還有必須有一些不同行的好朋友做你的支援和吐糟坑，可以對着他們痛罵衰老細與賤精同事。

(四) 口講無憑，立字為據---記着面對壞人，甚麼也要白紙黑字，因為無恥賤人一定反口覆舌，所以甚麼也要written，怎樣也要迫他們用email回覆作實，如果唔係就會將隻鑊瀉落嚟，十分唔抵。但凡遇上衰人，一定要在email開個folder比佢，記下所有他的惡行、醜態、平常不要輕易拿出你的「祕密檔案」，萬一他發難，迫你埋牆角，你就可以一铺清佢袋。

(五) 尊嚴無價----不少人為了保持「和諧關係」，而暗啞底，有Ｄ人為上位，或只為老闆兩句言不由衷的讚美而忍氣吞聲，甚至自我催眠，話自已成熟，顧存大局。我呸！我唔係鼓勵人不顧自已的job security，或搞不清自己的位置, 就胡亂去challenge 老闆，同事，但要相信如果我們已做好前四點，我哋自有頭上一片天，可以「高高興興上班來，平平安安回家去」。

幸福

2009-03-31T00:12:00.004+08:00

當我哋仲有時間，閒心講office是非，我哋係好幸運嗰Ｄ人。其實返工為乜啫？為＄吓！收到人工話之佢啦。有Ｄ波士覺得自己係人中龍鳳，曠世奇才，咪尤得佢囉！使乜同佢抝，有朝一日，呢Ｄ人會自食其果。

Credit card積分計算之大覺悟

2009-02-22T13:46:00.000+08:00

「點解我做嘢效率高，業績好，都得不到老闆垂青？」因為你未搞清你老細的計分標準囉，死蠢！

好似用credit card咁：幾時之內，買幾多＄的乜嘢貨，就可以換幾多積分。正如打工時，你係何時(timing)，做咗幾多(quantity/frequency)合老闆心水嘅事才有積分，老細先“li ke”嘛。今日唔講timing 同 quantity，好多人單係搞唔清礎 “啱睇”呢一點就焦頭爛額。

當你個老細(特别係在唔多使講output嘅機構工作嗰Ｄ)，佢最睇重可能係邊個生得靓Ｄ，把口乖Ｄ，氹得佢開心。咁樣你一日做到黑，係就係就有成果，但係做到殘哂兼無Ｄ笑容，想老細睇你都難啦。又有Ｄ”大ma 沙”，最鐘意下屬係佢面前大鬧佢嘅敵人，好似我老細最搭我糖，就係我話嗰Business Development Director無料嗰時，哈哈！講完即刻批我CNY放大假。

各位係唔係覺得好灰，點解絕大部份坐親係上位的大人，都係昏君，心胸狹窄，仲意人哋 ”疴魚”奉承，搞到小人當道？唉，雖知能放開名利的人，都沒有雄心上位，by default，上到位的人對追逐名利特別鐘意，所以佢哋要面子，講排場，要聽甜言蜜語！

我阿Yen，比大家職場朋友的忠告係，搞清礎你老細的「計分標準」，才計劃你的工作優次就啱嘞。呀，仲有最緊要嗰樣係：面對昏君，千奇唔好單係走精面，一味諗住氹得掂老細就算，你一定要練好本事，因為有咁樣嘅老細嘅公司遲早倒閉，你要揾第份工嘛，即使只係換老板，你都要有實力才不致被廢柴老板連累。新年新開始，執生呀！

Who moves my cheese

2009-02-19T00:52:00.002+08:00

十年前呢本書好紅，當時係香港自七十年代經濟起飛後，遇到第一個超勁的經濟轉型，很多長工變合約，乜都私營化，商業化，今日請你，下個月炒你，好平常。自從嗰時開始，做慣政府機構嘅人才知道這個世界沒有天長地久，Who moves my cheese這本書提醒人如何面對轉變。十年後又有金融海嘯，好多人會失業，大學畢業找不到工作。雖然過咗十年，大家都明白世界難撈，但係好多人仲好懷緬昔日的好日子，成日話以前點好點好。講老實嗰句，好多人係政府機構養懶咗個人，所以才那樣困難去適應現在的生活，怪誰呢？

誰令你"心黐"

2009-02-06T03:22:00.002+08:00

自從97金融風暴，香港每隔三、兩年就有些唔老嚟的事，經濟時好時壞，時唔時都有裁員潮，搞到人心惶惶。我眼見不少同事被裁，"幸存者"亦有不少變成 "心黐"一族。呢種人雖是有工做，但經歷架構重組，換老細，工作要求不斷改，結果，嚇儍咗，神經質，兼有被迫害妄想症。佢哋的完全喪失判斷力，試舉一例：

我：下星期開staff meeting，請將上月的工作報告分發，每人一份。

(行政助理)甲：哦 (眼神呆滯)，咁你想我影印，派hard copy，還係send soft copy 比同事。(唔係咁都要問呀？！)

我：無所謂，總之係Friday前分咗就得。

甲：係咁，駛唔駛幫你哋準備lunch ?

我：照舊啦，食三文治

甲：ar ar...(.面有難色)，咁我應該去canteen 個sandwich bar 買，還是去 Pacific coffee 訂呢？

我：你決定啦....

十五分鐘後....

甲:有同事要吃熱的，咁....

各位，我可以講乜？？

貪功冒進

2009-01-22T23:26:00.003+08:00

年近歲晚，與豬朋狗友相聚。見面又大吐苦水，話題又是圍繞公司的年輕員工的怪行。話說他公司有一位青年才俊，到公司只有一個月，但凡是大Ｐｒｏｊｅｃｔ均表示興趣，仲好落力做嘢，本來係好事，之不過有時有點"唔知定"，人哋好心提佢，佢唯唯諾諾，但仍然堅持自己的方法，老友感慨，現今的年輕人一味喜歡突出自己，又不自量力，累死同事，兼上司。唉，現今的靚仔靚妹真係安好好反省。

咪當我老襯

2009-01-19T02:39:00.004+08:00

天下間真係有黑狗偷食，白狗當災。早前提到Business DevelopmentDirector請咗一批年輕OLs，佢哋本年第一"激 "(激氣個激)，就係要在"X展"搞個超級showquali大會，結果礙於欠缺經驗，頻頻出錯，大老闆問起責來，就話我哋呢team老屎忽做乜就手旁觀，唔以大局為重，幫佢地補位，之後當然係迫我哋同Ｄ行家打哂招呼。做就做咗，但我哋成team人媽媽聲。想當年我哋跟甩單、比人X到飛起，边有人幫你頂，我心諗有錯我哋要執漏，但又唔見有乜着數，揾笨呀！

2009拆局

2009-01-04T10:36:00.002+08:00

見下面位Pearl寫08大事回顧，(你個office部好過癮喎！)、我都唔執輸，講下敝公司的09新走勢。

今年會係詼暗不明的一年，會有好多暗湧。當日我老細以"疑似"電訊魔Ｘ的style，潮爆型格入主本部門，又話搞Ｄ乜嘢大革新，但經過呢幾年，大家都知道佢係講就天下無敵，做就有心無力，"揸灘"到爆，所以我哋一班同事已經係上有政策，下有對策咁應酬佢。哈哈！本來相安無事，但係總公司嗰面都收到風，知道呢條友吹水唔抹嘴，為咗業績，係舊年第四季時，請多咗個乜鬼business development director，嘩哈哈，美其名是乜鬼市場研究，但實質上係昅實我哋搞乜，遲Ｄ梗係要我哋配合佢Ｄ研究結果啦。

不過我個吹水老細都唔呆，臨年尾即刻去南美一轉，簽咗幾個大projects，唉，今年一定做到仆街，不過咁既時勢有得忙好過無。嗰個ＢＤＤ梗係想一嘢鋤死我老細，佢竟然係呢兩三個月內，扭掂總公司，請咗四個assistants比佢，嘩由one man band，變咗五大惡。我睇BDD都係咸蟲一名，如果唔係，點會請襯一定係三十樓下，行路扭扭下ＤOL吖！

遲Ｄ就有嘢睇啦，我哋兩條team固知然要互毆求存，呢班OL為咗得老細歡心，必有一番惡鬪，2009將會係精彩的一年，大家繼續留意kiupai網啦。

2008 大事回顧

2009-01-03T13:58:00.002+08:00

2008年可說是office 的多變動的一年。

1) 為了減低成本增加工作量，老板請左好多剛中學畢業的少女工作。其實我又唔明原因與結果有咩關係。
2) 大老板不大滿意經理a 的表現，結果︰唔比佢用公司車見客。不過經理a照收人工唔做野..只係改坐的士見客....
3) 去年雨水特別多，公司內起碼見過10次以上...有同事冇原因下狂哭... 雖然滿瞼淚水不過都要食埋碗糖水。
4) 08年頭好地地著得端端正正...年尾見同事變身加low cut.... 失戀？想愛？
5) 待續...

自知之明

2009-01-02T00:34:00.002+08:00

2009年的第一個工作天，本來應該講吓正面鼓勵的說話，不過實在講唔出口。唉！因為我有一位好好人的同事，但工作能力低。如果佢 "知定"，懂得走位，少Ｄ乞老細憎，少惹禍，太家都可以容忍佢做野唔掂，不過佢就成日想大家認同，自告奮勇搞大projects，次次搞到一鑊粥。我地大家又要幫手補鑊，真係唔知點算。唉，今年啱啱開始，仲有排頂呀！！

請自我檢討

2008-12-31T01:10:00.001+08:00

各位家長：如果你有以下的問題，在埋怨之前請自我檢討。

- 我個女成日唔肯做功課：咁你自己有無成日係公司 “吞噗”，拖住Ｄ工作，等到最後一分先做？

- 我個仔好惡教又無耳性，話極都唔聽：你又有無用心聽過你隻乸或個衰佬講嘢吖？

- 我個仔無Ｄ礼貌，成日對住我大叫：請問你上一次同你個菲傭講 thank you係幾時？

- 我個女一味心頭高，淨係想揾個有錢仔，將來唔駛捱喎。唉…..：你一日掛住炒樓，炒股，揾快錢，咁又點計先？

- 我個仔淨係識上網，打機……,：你除咗打牌，約Ｄfriend吹水，去電腦商場，行街，shopping，食嘢，你仲有乜消遣？

衰仔樂園

2008-12-28T23:13:00.003+08:00

兒童樂園？衰仔樂園咋啩......。好，等我爆吓我office的奇人怪事。講起我個老板，未見過有咁孤寒嘅人，過年奉旨無利是(過年咁搞法，利是都無封，你話幾唔老黎)，有新同事到任，又焗我哋分担請食飯費，聖誕party抽獎，竟然夠膽死攞舊年去LA總公司visit時，得到嘅公司紀念筆來抽，真係cheap到震。但咁都未夠衰，最抵死係佢又鐘意扮caring，成日話搞Ｄ文娛康樂活動比同事relax吓，次次人唔到，就預咗，但贊助費又唔到，老實講，我哋成班同事有家室，自然想返屋企，無家室放咗工，都想自己揾節目，邊想同老細，同事一齊吖。成日咁搞法，嘥哂Ｄ時間，正瘟神！

辦公室食物錬

2008-12-27T10:15:00.002+08:00

有時也在想為什麼有一些人可以在辦公室內生存，還悠然自得，羨煞旁人。我想這就像曱甴，在食物錬好似無咩可取，事實卻在維繫整個食物錬。

辦公室亦然... 自大的老板需要擦鞋人、擦鞋人需要容易被欺負的同事、容易被欺負的同事需要正義朋友、正義朋友需要有錢父母... 又或者︰

勤力的老板需要懶惰的下屬、懶散的下屬需要勤力的同事、勤力的同事需要一個冇制度的辦公室、冇制度的辦公室需要一個勤力的老板。...

衰老細

2008-12-26T14:28:00.002+08:00

估唔到我嗰篇「裁員」會引起咁 “大” 迴響，與其自救，不如諗計令老闆 “消失”。呢個提意很好，但現實中，比較難做到。實際Ｄ，不如講吓除咗自我增值，自強不息，揾過第二份工之外，仲有乜嘢可以做來處埋一眾衰老闆。但未做之前，要搞清以下幾個闆題：

首先，正如大導演李安話齋，每個人心中都有個「斷背山」，我哋身邊都一定幾個衰老細，但你點樣定義乜嘢叫「衰老細」呢？有好多人，劈頭第一句就話：「好惡，成人鬧人！」對唔住，我唔覺得「惡死鬧人」係衰，除非佢係無理取鬧，各位職場朋友，如果純粹因為老闆鬧你，你就覺得佢衰，請你好好反省，兼且應多花時做好自己的工作，老實嗰句，你未夠班睇「橋牌網」，ok？

我今日要講嘅係有以下疾診的老細和"處理"他們的諳病藥方:

癱瘓(懶)兼斜肩(卸責)：鹿筋兩分 (你老細懶，你就要多走兩步，但記住份量只是兩分，太多就唔抵！)，續斷三錢 (勤力，但千萬不要幫佢做哂，如果唔係一定將所有嘢卸比你，所以要時做時唔做)。白朮十錢 (所謂白，係你自已的表白紀錄，對付呢Ｄ人最緊要乜都寫低，因為佢自己懶，倒頭來一定赖你，所以乜嘢都要白紙黑字，术者，有機會就要表述比人知，有朝一日你可以取替佢都未定)。

點解可以比佢出街

2008-12-17T10:53:00.002+08:00

想極唔明點解有老婆容許自己老公穿得寒寒酸酸，出來見人。

隔離team head，大把錢但出名孤寒... 有日同佢開會，傳來一陣怪味... oh... 原來在人地team head 身上發出。佢件外套好似剛從衣櫃取出，up 左成年，終見天日...但那陣氣味，一聞難忘...佢老婆冇理由唔知... 點解仲放佢出來嚇人...

吊腳褲污衣領係佢嘅制服...

我得出一個道理︰佢老婆同佢有仇.. 又或者呢個係防佢「滾」嘅方法。正！

裁員

2008-12-16T23:50:00.002+08:00

金融海嘯，不少老闆借刀殺人，聲稱為保持競爭力，必須裁員節流云云。被殺的人有該殺的人，但也有不少枉死的人。有些枉死的人，並非能力不遞，也沒有什麼大過失，他們"該死之罪"就是「得罪老細」。世界唔好，大家想保住份工，就要小心同老細相處，但也千萬不要將自己變為奴隸獸，因為好多老細駛到你盡，但最後還是一腳踢開你，所以要找出有利自已的策略性位置，最實際的莫過於找出自己的優點，令老闆不知不覺地依靠你的優點行事，只要他/她覺得你好使好用是不會炒你的，另外要估計現在的工作還有沒有前途，如果是夕陽工業，那你必須快點重新訂位，接受再培訓，找出路，畢竟、出來工作，還是實力最重要。至於怎樣同衰老細相處，下次續談。

辦公室生態研究

2008-12-14T03:03:00.002+08:00

樓下那位：你個office都幾搞嘢，不過我估你要同一大堆咁頂癮嘅人開工，一定好勞氣。其實一個 office好似一個小社會咁，梗有人做giver，有人係taker。如果有人咁抵諗，咪由得佢囉，總之唔好做蝕自己就得啦。

誰是查fit 人？

2008-12-12T11:40:00.001+08:00

聖誕將近，公司當然又係時候攪christmas party，我個team 負責買禮物，其他team 負責食物之類。

今朝經過經理a個位，見到仲有d禮物未包，好奇問下攪咩鬼。經理a話叫左文員c包，文員c話花紙用完，冇得包。於是我問經理a 點解文員c唔自己去買花紙呢？經理a話︰「吓？佢叫我買佢先可以包...」我同經理a講今日一定要叫文員c自己攪掂....

放工時，經理a 好開心話已經攪掂左。係文員c包嘅。我問張花紙邊度搵返來。經理a話︰「我lunch時去買架。」

除了滴汗無話可說。

內臭難除

2008-12-09T18:14:00.002+08:00

今天同事講起這個詞彙，覺得真是好句。

不明白下屬永遠不按指示工作，喜歡自以為是。好一句「內臭難除」解去我的心結。如果心內不求進步，只想用公司時間食下野，講是非... 那又怎會按指示工作。

老實講原來人最喜歡不是生產、埋頭傾點樣請假最jetso... 人生也不過如此...

看見我的同事，我也不禁嘆口氣... 左邊一個呆右邊一個無事忙、前邊一個是非王後邊一個扮聰明...天呀！可憐我啦。

Harmony≠Peace keeping

2008-12-04T00:39:00.002+08:00

好多年前watcher的老闆告誡下屬，一個healthy 的office，不可以一味包容，避免conflict，為了相見好，扮友善，互相抬轎。他說那種叫做keeping peace，並非真正harmony。

要Peace keeping暗示環境並不如想像中和諧，因為一切的維(持)和(平)行動的目的就是避免開戰。既然暗藏爭執，要處理的，不正視問題，多會引發更大的衝突。
至於harmony，其實不代表不可以有不同的觀點和差異。以西方音樂的和聲創作為例，一個和聲由不同的音階組成，只要根據一些寫keyboard harmony的原則，好好的組織、配搭，就能產生悦耳的和聲。套用在人事管理上就是所謂團體成員組合的藝術，組合得宜，就有和諧美妙的效果。至於強化office的harmony的最有效原則，莫過於強勢又自我中心的同事，不要只顧自己的方便，而家嫂型的同事，要assertive，要有主見，平衡強勢同事的霸氣，形成制衡。當互讓互利的工作文化形成，那office harmony就指日可待了。

Happy Together

2008-12-03T10:51:00.002+08:00

辦公室是一個很有趣的地方。各同事之間的互動又可帶動不同的效果。

眼見team A 的人事關係，實在有d好笑。老板終日出街搵生意，小如只賣一個小廣告，他也歡歡喜喜接來做。明明冇錢賺，都要接。想來想去，相信這是老板的生存之道。當老板忙於出外，其他同事當然施展渾身解數，想盡辦法點樣做小d... 狂放病假、扮好忙... 當老板回朝，即擺出一副非常關心老板的樣子，努力擠出笑容說些九唔搭八但令人滿心歡喜的說話。如果你是實幹型，一定會激到吐血而死。

既然世界是這樣，為何不 happy together!!!

你做乜咁惡啫…….

2008-11-30T19:49:00.000+08:00

唔知從幾時開始，全世界，大部份人都中了「大好友咒」，諗嘢、講嘢、待人接物，要盡量提正面的，即使是明明不好、錯都要用 ”甜言蜜語” 包裝過才可以講出來，如果唔係咁，就會被人認為唔夠diplomatic、唔懂人情世故……。最係好多，好多家長都中「咒」，明明仔女好曳，就話佢活潑，把口衰，就係口齒伶利，懶讀書，就賴教育制度僵化埋沒佢嘅多元智能。呢Ｄ細路，一直活係麻醉劑中，直到有日出嚟社會做事，唔掂，比老細罵，才知道世界難撈。呢亭人，拿不起自信 (因為工作能力低)，放不下尊嚴，比人話幾句，唔係發老脾唔撈、就係喊住咁話：「你做乜咁惡啫……。」我好想話比嚟Ｄ淨係可以聽 “正面訊息”的少爺、小姐、先生、夫人、聽：「你好唔掂當呀！！！」

各有前因莫羡人

2008-11-30T19:22:00.001+08:00

「親疏有别」早已有之，不過自從曾特首講過，它已經成為香港潮語。與昔日書友班聚，他對於自己老細極力維護工作能力奇低的同事，忿忿不平。其實在辦公室玩「親疏有別」好平常，正所謂各有前因莫羨人，如果一位能力低的同事都得到老細極力迴護，相信她/他一定有些祕技取得老細信任……(唔好即刻諗埋Ｄ衰嘢，哈哈通常呢Ｄ人都會比人傳佢同老細有路)，例如：有Ｄ人可以放低哂理智、尊嚴或者專業判斷，做到無論老闆提出幾白痴的方案都可以講得出“老細英明“，又或者明知老細怕做衰人，一味扮victim搏同情……又或投其所好，老細信風水咩，就跟蘇師傅進修，望搭到嗲……老友如果你做唔到呢Ｄ祕技，就唔好怨嘞，返工時，比心機做快Ｄ，做好Ｄ，放工咪又一條好漢囉，記住：工作當然可以係生活嘅全部，但問題係，你做緊嗰份工值唔值得你咁做？？

人都癲......

2008-11-21T01:54:00.002+08:00

朋友打電話來大吐苦水，來來去去都是那位問題下屬。一位四十多歲的大叔。學歷不高，但因年資深，拿高薪，自從架構重組，徨徨不可終日，結果影响精神健康，現在每天都是神經兮兮。

大家同情他之餘，要分担他的工作，又要兼顧他的自尊，即使他常犯錯，但也不知做什麼才好，明知他是家庭經濟支柱，失去工作，真怕他做儍事，暫時無人想背負惡名，但求補鑊成功，便不上報，調了與他一組的人，只嘆倒霉。

金融诲嘯殺到，大吹裁員風，更多架構重組，工作壓力大增，同事關係緊張，原來已十分脆弱的人，更受打擊。未來一年，患上精神、情緒病的人將會更多。如果你是我的朋友，你會怎樣處置那位問題員工？從來情理兩難容！

史上最令人......的人事組合

2008-11-18T00:04:00.001+08:00

史上最令人窒息的人事組合：
偽善的老細；表面相親相愛的peers；仲意講是非的下屬。

史上最可悲的人事組合：
一味好人的老細；有能力而昧於形勢的peers；同理一班有心但無能的下屬。

史上最可恨的人事組合：
徧心的老細；一大帮靠擦，靠卸而上位的peers；25仔下屬。

史上最令人聞風喪膽的人事組合
志大才疏的老細；一身酸腐味，好似全世界欠咗佢的peers；自以為是，但又永遠要你收拾殘局的下屬。

續瘋狂辦公室

2008-11-16T02:41:00.000+08:00

又一段真實對話：

威哥：係present 橋比陳生聽之前三日，我要睇過個powerpoint
Tommy 仔：好吖。

距離present 之前兩日……

威哥：喂，距離present 仲有兩日咋喎，快Ｄ比个file我睇啦。
Tommy 仔：得得得，今日下晝啦。

距離present仲有一日……
威哥：個Tommy仔死咗去邊呀？依家十點半囉喎，人唔係度，又無交低file….。
阿Sue: 真係唔知喎boss….不如我幫你call佢啦。
威哥：快Ｄ啦….。

距離present 仲有半日
威哥：阿Tommy哥，你今朝去咗邊度呀，成11点先噃…..
Tommy仔：對唔住，對唔住，尋晚為咗陳先的present，想度多雨條橋，所以夜哂。唔好意思起唔到身….
威哥：唔好講咁多，比个file我睇…..

五分鐘後…..
威哥：你唔係呀嘩，呢個file，同我當初交比你跟嗰時，有乜分別呢？
Tommy仔：係囉，所以我尋晚咪想度多Ｄ橋囉！

Pro

2008-11-16T01:29:00.002+08:00

無線今年的「萬千星輝賀台慶」似乎很利實力派演員，有人話可能無線呢兩年比人鬧得緊要，都要順應民意。我覺得今年夏雨，米雪，黎耀祥攞獎，係ＴＶＢ睇中實力派演員得獎更有賣點，更能掀起全城熱話。

風水輪流轉，好似流行樂壇，早幾年興埋Ｄ樣靚而不懂唱歌的人，結果日子一長，大家都頂唔順，又開始紅番Ｄ實力派歌手，電視圈都係咁，日日睇埋Ｄ哭笑不分，浮誇演技，真係好悶，睇到好戲之人做戲，寧啥醒神。夏雨得獎，他說是一個里程碑，希要將來有更好成績。有次聽李香琴接受訪問，她都七十幾歲人，仲話要等好劇本，因為咁先有突破，唔好理呢Ｄ資深演員係講客套話，還是真心話，起碼你覺得佢 Pro，他們穩定的表演水平，演戲做到恰如其份，已可向電視台和觀眾交待。最怕聽到Ｄ藝人話自己好鐘意演戲，但唔熟讀劇本，遲到，有些少知名度就扮哂嘢......。當然除咗娛樂圈，各行各業都好多偽人扮Pro囉.....！

汶川地震

2008-11-14T04:26:00.000+08:00

自五月十二日發生大地震至今有半年時間，希望大家的熱情不減，繼續關注重建事務，支持受災人士。救災之路漫長，不可三分鐘熱度，像某些曾在沙士時期出盡風頭的單位…….現在還記得受沙士後遺症影响的人嗎？

你惡過葉劉

2008-11-14T04:11:00.001+08:00

有位「兒童樂園」的超級fan屎，話我上一篇「瘋狂辦公室」，有唔尊重基督教之嫌，佢話：「基本法訂明香港人有信仰自由，基督徒係法定假期返教會有乜唔啱？咁都插，你重惡過葉劉……。」

太抬舉我啦，我邊有得同葉太比吖？況且我絕對唔係唔尊重信仰，只不過衰寫Ｄ唔寫Ｄ。據報，呢位阿嫦係office嘅作風，令人反感。佢聲稱自己係一位基督徒，好熱心教會事務。但係平日做嘢，勁差，一味靠擦鞋，搞黨爭…….。佢Ｄ同事唔係懷疑佢星期日無返教會，而係咁嘅人品，點頂吖！？

瘋狂辦公室、

2008-11-12T23:47:00.006+08:00

以下是一段真實對話：

Hilda 姐：阿陳，下個月我會調你去樓上個studio....

八婆陳 (但佢係一個男人)：吓，甘咪即係24樓，唔好啩......

Hilda 姐：近你條team，方便工作喎？ (心想：益你咋)

八婆陳：我出年犯太歲，流年不順仲去 "易死"樓，貪好聽咩
**********************************************************************
Hilda 姐: 玲玲，office 裝修，你暫時搬去廚房旁邊坐住先啦......

玲玲: (呢位姐仔，二＋二歲，但望落似四十二)，唔得吖，我命格火旺，仲要近爐灶，火太旺，我一定運滯 .....

Hilda 姐：(邪睥眼前呢位美少女) 哦，你搬咗去厨房旁邊，會唔會運滯我就唔知，不過唔搬去，就轉運，可以即刻轉工做麥玲玲囉！

*****************************************************************************
Hilda 姐：阿嫦，星期日跟隊crew出去拍條宣傳demo，我星期一要交比老細睇。

阿嫦：Sorry呀，星期日我要返教會，跟唔到crew....

*****************************************************************************
一個月後，這間公司倒閉........

遊船河

2008-11-09T23:51:00.002+08:00

看柴門文女士的「日本入門」，其中一章是講佐渡「木桶船」之旅，說她與同伴一坐進大木桶，船即刻下沉，嚇個半死。我就想起曾在西湖坐小船，船撑到湖中心，突然晃得厲害，也夠嚇人的。奉勸各位旅遊時坐小船，一定要抓緊救生工具，例如浮版之類的東西。

柴門女士的漫画在十年前很火紅，一套「東京愛的故事」風靡萬千少男少女，人人都有心目中的赤名利香和三上。近年她多寫散文，不過無論是她的漫画或散文，對城市生活都有深入細微觀察。

大家有空可看看柴門女士的漫画和散文。

名人講座

2008-11-09T22:22:00.001+08:00

最近朋友常邀請我參加各式各樣的講座，講者都是甚具名氣的大師級人馬。有些講座擠得連站的位置都沒有，來者男女老幼，中外人士，甚麼人都有。可是參加這些講座多是敗興而回。有些「大師」一來就是具細無遺的數自己的威水史，再來就擺開一副「捨我其誰」的架式。

不過為甚麼某些「大師」火紅，萬人追捧？因為我們喜歡以外在條件判斷人，例如樣貌或演講技巧。賣相佳很着數，識講嘢吸引人。很多「大師」的講話很生動，有趣，但內容就認真麻麻，但聽衆卻是如痴如醉。下次聽講座，多注意內容並留意Q&A的表現。你會發現不少所謂勁人根本不能正面，直接回答提問，那你就要考慮下次猛人講座要不要來了。

Nomads

2008-11-07T13:55:00.003+08:00

Hey watcher, I overheard this conversation between other watchers in a noodle shop. They described how this other watcher, who is not paid market wage, survives. He doesn't have a living place in Hong Kong. Instead, he lives in the building he guards, cooking and showering there. At night, he scavenges for rubbish before sleeping at his desk. He has a girlfriend in Shenzhen. Maybe we can all do that too to save rent money.

甜言蜜雨

2008-11-06T23:59:00.002+08:00

看了金城武扮死神的電影-----「甜言蜜雨」。有些人也許因為金城武帥氣而看這套電影。我係因為睇錯另一套戲的時間，誤打誤撞，睇咗。最初唔覺得套戲有乜好，但睇到中段，特別係死神同佢隻狗探討生死意義的對話，既發人深省又令人會心微笑。我都唔講咁多嘞，大家有時間去睇睇啦，好過睇無記電視劇。講開無記，一定要提吓陳志雲，一個不甘只做幕後高層，其實陳志雲論才學、外貌、聲線，都好ok。但係由05年大長金訪港，三年內，陳先生無論任何大小喜慶都出現，兼主持節目，我實在想同陳生講----夠了，套套劇都係鍾嘉欣，林峯，你都悶啦。下次不如換吓樂小姐或者珍姐出鏡。

會否有一天六嬸日日向你演唱佢Ｄ英文曲呢？

趁熱鬧

2008-11-06T23:37:00.002+08:00

又趁吓，講奧巴馬當選美國總統。我有個好鬼死不喜歡美國的朋友 (他自認有偏見)，昨天都說美國的制度有它"優越"的一面，起碼美國人民透過選票申張自己的意願。講番輸家的麥海恩，他也很graceful，這點要學的，處於下風都要保持風度，不要發爛渣。

每日金句

2008-11-06T17:27:00.002+08:00

中文字真有趣，廣東話更好玩︰

1) 有個客急call 有事幫忙，第一時話比老板聽，佢第一個反應係︰「點解個客搵你唔搵我，佢明明有我個電話...」
2) 有客來開會，同事送上各人一樽「嘩哈哈」，問同事點解在office 開會都要飲「嘩哈哈」？同事話「衛生d」... 我地d水有「退伍軍人症」？
3) 有個客同老板講︰「我覺得你好有學識，有個問題想請教你。」我老板即刻雙眼發光... 個客問︰「點解d香港人唔多喜歡保護白海豚？」老板話︰「oh 因為香港人鍾意食魚翅...」個客即刻 O嘴。

The fall of passion

2008-11-06T15:56:00.002+08:00

Passionate people tend to be well-employed and want to push things forward. Well, in the time that I have written 2 websites and a user-authentication script, these people still haven't filled in a 2-page form. So they are not passionate?

身同感受

2008-11-06T02:20:00.002+08:00

樓下那位：每一個office都有個人版，無計。好似咁：

Supervisor: 唔該你盡快幫我送封信去xxx大厦
伙記: 哦

一小時後....

Supervisor: 送完返嚟嗱
伙記：吓...(O嘴)，未送喎
Supervisor: 點解呀？
伙記：我仲有其他嘢做，唔得閒
Supervisor: 你又唔講，我可以揾第二個送嘛
伙記：你無問喎！

兩天後

Supervisor: 唔該你今日三点前送份文件比黃生簽收。
伙記：好丫
Supervisor: 無其他嘢做丫嘛？得丫嘛？
伙記：無問题

下午二時半，佢送完噃嚟

Supervisor: 送完囉可
伙記: 送咗
Supervisor: 簽收張嘢比秘書做filing 就得
伙記: 呀!我放低係counter，無簽收 (蚊咁細聲!)
Supervsior: x#!78@@

星期一, morning briefing 時
Supervisor: 各位同事，你哋做嘢，第一要安排工作的先後，第二聽清礎0rder，先做吖，如果吾明，就問啦！
伙記甲：如果幾件工作堆理一齊點安排先後？
Supervisor:邊個急咪做嗰個先
伙記乙：但係個個都話急
Supervisor: 咁睇每个job嘅deadline嚟分先後囉！
伙記丙：(舉手)有時Ｄ老細無講清礎deadline？
Supervisor: (心想:係咪咁精呀你!) 唔知就問啦
結果係Supervisor 日日收到十幾個calls，Ｄ"靚"問理Ｄ無厘隙沙野。死未！？

下屬累人症

2008-11-05T12:36:00.000+08:00

為了好好整頓辦公室行政，一個最唔守規矩的老板下令pearl 要做office admin。估唔到原來管人唔難，最難係你的下屬聽唔明你講野，自己自行運作，但做錯又扮唔知。我手下起碼有3大「勁人」。

1) amy 小姐
- 交低一件工作，佢可以轉頭好誠懇地問你，「你頭先係咪叫我幫你做d 野，可唔可以講多次？」
- 之後以為識做，點知再問，佢話「我仲想緊你叫我做什麼？」

2) 男男
- 堂堂一個男子，每當做錯事，就會以佢一貫的笑聲掩飾，話︰「呀，你出個廣告好似有錯字，唔知點解呢？」(心想) 個廣告你做個wo，唔知點解？無名火三千丈....

3) 人人愛
人人愛最喜歡打發時間係以食、食、食。食可以解決問題。包括你叫佢做野，佢會嘴都唔抹，叫你比d時間佢...比d時間佢...

唉！

Challenge 我？

2008-11-05T00:42:00.000+08:00

有口痕友challenge我，話應該將「工作厭倦症」改成「厭倦工作症」，咁嘅中文先至順喎。

口痕友有所不知，「工作厭倦症」，並非解作討厭工作，而係「工作環境壞死併發厭煩疲倦症」，學名嘅縮寫呀，懵丙！

Pearl is here!!!

2008-11-04T10:17:00.000+08:00

今天上班途中，遇見一有趣的士司機，他說剛載了3位粗口爛舌的女孩子。還說人不可以貌相，再說睇相可知能否嫁個有錢人..云云。

回應watcher，可能嫁個有錢人先係最好的一份工。

工作厭倦症

2008-11-04T01:03:00.000+08:00

昨天與一位朋友見面。他只不過是四十歲，本地大學畢業，是香港高等教育中的末代精英(那時香港只有兩間大學)，但己"退休"兩年，現在靠積蓄渡日，一星期返三天興趣班，平日讀書，看電影。

你怎樣評價這種生活？羨慕？妒忌？越來越多人想提早退休。有些人認為現今年青人或在職人士，沒有上一輩人的敬業樂業，一天到晚嫌份工悶，怨老闆衰......，這個說法也許真確，但我相信有不少人，不是因為上述原因而離場，而是患了一種 "工作厭倦症"。這與惰懶無關，相反最容易患上此症的人通常是熱誠，有理想，自我期許甚高......當然因此症而有本錢唔撈的人多是經濟負擔較輕的單身人士。

我的朋友選擇"退休"，是因為他任職的教育機構，己不再為教育下一代而存在，而是為資源爭奪、搏出位、攞noise，吹噓"業績"而忙乱終日。我覺得像他那樣有heart，其能力的人選擇 "逍遙渡日"很可惜，他的遁世是年青學子的損失。我希望各行各業的隱世高人，閉關期滿，再闖江湖，鎮攝奸邪，造福人群。

The first post

2008-11-03T22:59:00.000+08:00

Ladies and gentlemen. Welcome to our playgound, where we play kiupai.